У Брэсцкім дзяржаўным тэхнічным універсітэце адбыўся першы абласны фестываль інжынерных класаў, які сабраў навучэнцаў, выкладчыкаў і прадстаўнікоў адукацыйных устаноў з усёй Брэсцкай вобласці.
Фестываль быў арганізаваны з мэтай развіцця станоўчага іміджу інжынерных прафесій, пашырэння сеткі профільных класаў інжынернай накіраванасці ва ўстановах агульнай сярэдняй адукацыі Брэсцкай вобласці.
Арганізатарамі фестывалю выступілі Брэсцкі абласны выканаўчы камітэт, Брэсцкі дзяржаўны тэхнічны ўніверсітэт і Брэсцкі абласны інстытут развіцця адукацыі.
Адкрыў фестываль рэктар БрДТУ Сяргей Антонавіч Каспяровіч. У сваім выступленні Сяргей Антонавіч падкрэсліў важнасць інжынернай адукацыі ў сучасным свеце і неабходнасць падрыхтоўкі кваліфікаваных спецыялістаў для розных галін эканомікі. «За інжынерам не толькі сучаснасць, але і будучыня» - адзначыў Сяргей Антонавіч.
У ліку ганаровых гасцей фестывалю прысутнічалі Таццяна Анатольеўна Чанава, намеснік начальніка ўпраўлення агульнай сярэдняй, спецыяльнай і прафесійнай адукацыі Галоўнага ўпраўлення па адукацыі Брэсцкага аблвыканкама і Анатоль Васільевіч Машчук, дырэктар Брэсцкага абласнога інстытута развіцця адукацыі.
Фестываль інжынерных класаў праходзіў у 2 этапы: адборачны этап (дыстанцыйны) і фінал.
У адборачным этапе прыняла ўдзел 21 каманда навучэнцаў 11 класаў, якія асвойваюць праграму факультатыўных заняткаў «У свеце тэхнікі і тэхналогій: выбіраем інжынерную прафесію» з Брэсцкай вобласці. Дзеці паўдзельнічалі ў конкурсе відэапрэзентацый «Чаму я хачу быць інжынерам?» і рэкламных буклетаў «Я-інжынер...».
Па выніках адборачнага этапу ў фінал фестывалю прайшлі 6 наймацнейшых каманд:
- Каманда «Гімназісты», ДУА «Гімназія г. Белаазёрска»;
- Каманда «Генератар», ДУА» «Малатковіцкая сярэдняя школа» Пінскага раёна
- Каманда «ЭВАНІ», ДУА «Сярэдняя школа №4 г. Кобрына імя воінаў-інтэрнацыяналістаў»
- Каманда «Прагрэс», ДУА «Сярэдняя школа №19 г. Баранавічы»
- Каманда «Тэсла», ДУА «Сярэдняя школа №20 г.Брэста імя Героя Савецкага Саюза.М. Карбышава»
- Каманда «Кілават», ДУА «Сярэдняя школа №16 г. Пінска»
У фінале каманды спаборнічалі ў гульні Брэйн-рынг па змесце вучэбнай праграмы «У свеце тэхнікі і тэхналогій: выбіраем інжынерную прафесію» і падрыхтоўцы прэзентацый па абранай тэме членамі журы, такімі як «Разумны горад будучыні», «Экагорад будучыні», «Зялёнае» будаўніцтва.
Журы, у склад якога ўвайшлі дэканы факультэтаў універсітэта пад старшынствам прарэктара па вучэбнай рабоце Андрэя Мікалаевіча Парфіевіча, ацэньвала прэзентацыі ўдзельнікаў па некалькіх крытэрыях, уключаючы змест, крэатыўнасць і візуальнае афармленне.
Па выніках конкурсу і набранай сумы балаў камандай-пераможцам стала каманда «ЭВАНІ», ДУА «Сярэдняя школа №4 г. Кобрына імя воінаў-інтэрнацыяналістаў».
Акрамя таго, фестываль стаў пляцоўкай для зносін і абмену вопыту паміж навучэнцамі з розных школ, а таксама паміж навучэнцамі і прадстаўнікамі вышэйшых навучальных устаноў.
Правядзенне першага абласнога фестывалю інжынерных класаў у БрДТУ стала важным крокам да развіцця інжынернай адукацыі ў рэгіёне.
Мы віншуем пераможцаў і ўсіх удзельнікаў фестывалю і спадзяемся, што гэта мерапрыемства стане традыцыйным і будзе спрыяць далейшаму развіццю інжынернай творчасці і інавацыйных падыходаў сярод моладзі!
